كانيلوني بالصور

هاد الأيام جاو عندي شي ضياف وبغيت نبدل من اللحم والدجاج وقدمتليهم كطبق أولي هاد الوصفة وعجباتهم بزاف فقلت ننزل ليكم طريقتي على الله تعجبكم حتى نتوما وتولي معتمدة عندكم نبداو على بركة الله

المقادير

250g كانيلوني
كيلو ونص صلصة طماطم جاهزة
بصلة كبيرة
خيزوة
عود كرافس
4معالق كبيرة زيت الزيتون
رشة كوزة محكوكة
250ml بيشاميل
500gكفتة بلا توابل
4 ملاعق كبيرة زيت الزيتون
200gفورماج محكوك
ملح وإبزار حسب الذوق

الطريقة 

 

أول حاجة كرضت خيزو والكرافس مزيان منبعد ماغسلتهم ونقيتهم كنأكد خاسهم يتكرضو مزيااااان

درتهم في مقلاة سخونة مع الزيت والبصلة محكوكة

زدت الكفتة والملح والإبزاروالكوزة خليت الكفتة تتقلى

زدت صلصة الطماطم وخليتها تغلي شوية

قسمتها على زوج نص زدت ليه نص لتر ماء باش تكون عندي صوص جارية ونص خليتو هكاك باش نعمر بيه الكانيلوني وخليتهم يكملو الطاب

خليتهم تقريبا 45دقيقة وخليتهم يبردو شي 15 دقيقة منبعد ذهنت اللاطة اللي غادي نقدم فيها الكانيلوني بشوية زبدة درت فرشة البيشاميل وفرشة لاصوص

بديت كنعمر الكانيلوني بالوقفية وفي اللاطة نفسها بالحشوة الخاترة بلا مانوصل للراس يعني كنعمر غير ثلث الباسطا

كنكمل بنفس الطريقة حتىنعمر اللاطة بهاد الطريقة

كنغطيهم باللي بقا ليا من الصلصة الجارية

وبالبشاميل والفورماج وإلى الفرن مسخن على حرارة عالية 200 درجة كنغطيه بورق الزبدة لمدة 45دقيقة ومنبعد كنحيد الورق ونخليه يكمل الطياب لمدة 15دقيقة باش يتحمر الفورماج

وهاالطبق ديالنا واجد كنخليه يبرد شي نص ساعة عاد نقدمو لأن الكانيلوني بحال لازانيا كيشدو السخانة بزااااااف مممممم على ريحة كتحمق

بالنسبة للصلصة ممكن تتعوض ب كيلو ونص معطيشة مطحون بقشورها مع معلقة كبيرة معطيشة الحك راه نفس النتيجة
بالنسبة للبيشاميل أنا استعملت الجاهزة واللي بغات تديرها في الدار غادي نعطيكم طريقتي مع أني عارفة الأنيقات كيعرفو ليها كندوب معلقة الزبدة ونزيد ليها نفس الكمية ديال الطحين نخلطهم فوق عافية مهيلة ونزيدليهم 250ml حليب بالنسبة لهاد الوصفة ونبقى نخلط حتى يغلى الحليب ويختار نزيد رشة ملح ورشة كوزة محكوكة نخلط ونطفي عليها ما خاسهاش تكون عاقدة بزاف