حلويات واشمن حلويات بالتفاصيل والصور اكيد

كيفكم أخواتي كنتمنى تكونو في أحسن الاحوال اليوم جيت نوريكم الحلويات لي عملت لاستقبال أخي وتوأم روحي الي دخل المغرب بعد غياب طويل

على بركة الله

حلويات صابلي
الطبسيل الاول ديال صابلي استعملت فيه عجينة وحدة وهادي هي المقاديير :

500غ زبدة ماركرين 2زلايف سنيدة 4بيضات 2كيس فاني 1كيس خميرة الحلوى

الطريقة

نخلطو الزبدة مع السنيدة والفاني مزيان نزيدو البيض من بعد الدقيق والخميرة ونجمعو الخليط حتى نحصلو على عجينة رطبة
من بعد كنورقو العجينة وكنطبعو بالطابع الي بغينا انا استعملت في الشكل الاول مرشم الشميشة عملت واحد مسدود والاخر تقبتو من الوسط وزوقتو بوريدة لونتها بالاخضر ولصقتها بابيض البيض مني طابت رشيت الجهة الي غتكون الفوق (الي متقوبة ) بالسكر كلاصي ولصقت واحدة مع واحدة بشوية الكونفتيرديال الفريز وعاد عاودت زدتو حتى عمرات هاديك الفتحة
الشكل التاني عملتو بطابع مثلث بعدما ورقت العجين بمدلك عادي وعاودتو بمدلك مزوق مني طابت الحلوى لصقتها بكريمة الشكلاط ويمكن ليك تستعملي الكونفتير وزقتها من الجناب بالفرمسيل
الشكل الثالت عملتو بمرشم معرفتش سميتو هههه مني طابت لصقت كل قطعة بالاخرى بالكراميل وعاود عملت ليها الكراميل من الفوق وزينتها باللوز مسلوق ومقلي ومهرمش

اوا ها الطبسيل كمل بالصحة والراحة وهاد المقادير الي عطيتكم ديال العجين راه عملت بيه هاد الاشكال ب3 وللامانة راه مقادير مضبوطة وكتصدق وكتجي رطبة


بالنسبة لطبسيل التاني ديال صابلي والي هو الاخير في الصورالشكل الاول الهلال المقادير:

250غ زبدة ماركرين كاس كونفتير كاس زيت كاس سنيدة 1خميرة 1فاني الدقيق (كوك شكلاط كونفتير للتزيين)

الطريقة:

نخدمو السنيدة مع الزبدة والفاني نضيفو الزيت والكونفتير من بعد الدقيق والخميرة
نورقو العجين نطبعوه بمرشم الهلال والى الفرن مني كطيب الحلوى كنلصقو وحدة مع وحدة بالكونفتير كنوضعوها في الشوكولا دايب تم الكوك
الشكل التانيعلى شكل مربع استعملت فيه 250غ زبدة زلافة سنيدة 2بيضات 1فاني نصف خميرة والدقيق يعني نصف المقادير الي استعملت في الاشكال الاولى

الطريقة:

بعدما عجنت العجين ورقتو وقطعتو بمرشم مربع دهنت كل مربع بهاد الخليط :صفر بيضة ملعقة كبيرة كاكاو ملعقة كبيرة حليب سائل كنخلطوهم وندهنو بيه الحلوى من الفوق حتى كنوضعوها في الاطة من بعد كنزينوها بالفرشييط والى الفرن منين تخرج لصقو وحدة مع وحدة بالكونفتيروندوزو الجناب في طونيك محكوك
الشكل الثالتعلى شكل sapinمذاقو غزااال صراحة المقادير

500غ زبدة ماركرين 2صفر بيض كاس دانون نصف كاس حليب سائل دقيق (للتزيين 250غ سنيدة 2فاني 2بيض بيض)

الطريقة

كنخدمو الزبدة مع البيض ودانون والحليب من بعد كنضيفو الدقيق كنورقو العجين نقطعوها بطابع الي على شكل SAPIN كنغطسو الوجه ديال الحلوى في ابيض البيض ومن تم في خليط السنيدة والفاني وكندخلوها مباشرة للفرن قبل ماتسيح السنيدة حيت الى بقات كذوب من الاحسن حتى نطبعوها كاملة عاد ندوزها في البيض والسنيدة ودخلوها للفرن الي خاصو يكون مهيل ونخليوها طيب على خاطرها هي كطيب وكتنفخ كتجي بحال العجين المورق منين كطيب كنلصقووحدة مع وحدة بالكراميل

هادي صورة المرشم


وهادي صورتها في الفرن شوفو كيفاش كتنفخ


حلويات اللوز
انا كنعتامد في حلويات اللوز كلها على عجينة وحدة وهي عجينة الاخت امينة سامي الله يجازيها كل خير فعلا عجينة غزالة من نهار جربتها وليت هي الي كنستعمل دائما
المقادير:

1كلغ طحين 125غ زبدة ملعقتين عسل قليل من الملح قليل من المسكة الحرة ماء الزهر

الطريقة:

ندوبو الزبدة ونضيفوها للطحين حتى يولي عندنا عجين مرمل نضيفو الملح المسكة الحرة ضروري تدقوها وتغربلوها ونجمعو العجين بالماء الزهر

من بعد مانطحنو 1كلغ اللوز مع السنيدة نضيفو ليه 100غ زبدة بالنسبة ليا انا ماكنعملش الماء الزهر مع اللوز ولكن كنسمو بتنسيمات مختلفة شكل نسمتو بليمونة محكوكة كونجلي وشكل عملتلو روح البنان كيعطي مذاق غزال والشكل الاخير نسمتو بحامضة محكوكة كنت عاملاها في الفريزر

من بعد ورقت العجين وشكلت منو حلوة الياسمينة الغنية عن التعريف استعملت فيها اللونين الابيض والبنفسجي والشكل التاني ورقت اللوز قطعتو بقطاعة دائرية ومن بعد سرحت العجين عملت فوقو دائرة اللوز وعاود عملت طبقة اخرة من العجينة الي ورقتها وقطعت بنفس القطاعة قسمتها من النصف ونقشتها بالمنقاش وزوقتها بوريدات والشكل الاخير ورقت العجين قطعتوا بكاس وعملت فوق كل دائرة 3 لكويرات لونتهم باللون البرتقالي وجمعت الجوانب وزقتهم من الفوق بوريدات





كنتمنى يعجبوكم