زيت الخيار و الزنجلان بالصور

  زيت الخيار و الزنجلان بالصور 

 

 نبداو على بركة الله بالحاجة المهمة و الأساسية في صنع الزيت و هي تعقيم القراعي أي قرعة عندك الكونفتير أو ديال الدوا غسليها و غليها فالما هي و القفايل ديالها


و ديريها تنشف فوق شي سربيتة و هاذي هي العملية المهمة خاص القراعي ينشفو ما تبقا فيهم حتى قطرة ديال الما

دابا إن شاء الله نمرو لزيت الخيار حيت ساهل تنحتاجو لقرعة معقمة و خيارة و كاس ديال زيت الزيتون

هنا درت 2 المقادير لي و لصاحبتي ههههه. تنشدو الخيارة و تنمسحوها مزيان ما تبقا فيها حتى قطرة الما و نقطعوها شرائح رقيقة و نديروها فالقرعة و نزيدو عليها الزيت و نخليوها أسبوع فمكان مظلم و كل نهار نحركوها مزيان و من بعد نصفيوها
 

حتى توجد إن شاء الله و نوريها ليكم.
دابا ندوزو لزيت الزنجلان تنكتفيو برابعة ديال الزنجلان باش يالله نغلبو عليها فالدليك هههههه

و نطحنوها فالخلاط الكهربائي مزيان حتى تعجن

 

و نوجدو كاس ديال الما من الأحسن يكون معدني ومعلقة و نبداو ندلكو فعجينة الزنجلان و نزيدو ليها المعلقة الأولى ديال الما ونجمعوها

و ندلكو عاود مزيان و نزيدو المعلقة الثانية و ندلكو و نزيدو المعلقة الثالثة و نفس الشيء حتى تنزيدو المعلقة الرابعة ديال الما عاد تتبدا تبان الزويتة نحبسو الما نهائيا و نكملو الدليك ديالنا حتى تتولي تحسي بالزيت تتخرج مزيان و تعصريها بين يديك

صافي تتشدي زويف ديال حياتي أو بوبلين و تصفي الزويتة
 

غادي تعطيك الزيت و البقايا ديال الزنجلان ما تلوحيش أختي خليه باش ديري كوماج مع الملحة أو سانيدة

و هاهي الزويتة ديالنا واجدة
.

 شخصيا من أحسن الزيوت اللي تنستعمل هي زيت الزنجلان و وليت تنستعملو كواقي شمسي و ما تنساوش ديروها فشي قرعة ما تدوزش الضو أو غطيوالقرعة بورق الألمنيوم. و بالصحة و الراحة و اللي عندها شي ملاحظة تفيدني بها و لها جزيل الشكر.