غادي نقتارح عليكم جنواز بالفريز
المقادير :
*الجنواز
4 بيضات
كاس ع سنيدة
90 غ دقيق
1 فاني
* موس الفريز
300 غ فريز
150 غ كريم فريش (استعملت هولالا كيجي لكريم بها زوين)
150 غ سنيدة
2 اوراق جيلاتين
*التزيين
كريم شانتيي
200 غ فريز
ناباج
الطريقة:
نبداو بتحضير الجنواز
نديرو البيض بوحدو فهاد الطراب ونخليوه يطرب واحد 5 دقائق
بعد 5 دقائق نزيد سنيدة و فاني ونطربهم واحد 15 دقيقة (السرعة نديروها ف 5)
خاص يولي بحال هكدا بحال الرغوة
نزيدو الدقيق على دفعتين ونخلط هنا غير بملعقة الخشب
نديرها فمول مستطيل نكونو فرشنالو ورق الطهي وندخلوها للفرن (كل وحدة و فرنها انا خداتلي 8دقائق)
تخرج و نقلبوها فشي ثوب ونخليوها تبرد
على ما تبرد نجهزو لاموس
نطحنو الفريز مع السكر ونصفيوه باش نحصلو على كوليي (يلى مبغاش يتطحن تقدرو تزيدو شووووووووووووية الماء)
نديروه يسخن على نار مهيييلة بلى مايغلى نطفيو و نزيدو جيلاتين نحركو مزيان تيذووب ونخليه يبرد
ندوزو نطربو كريم فريش حتى تبدا تعقد
ملي تعقد نزيدوه على الخليط الاول ونخلطووو
نشدو الاطار الدائري ونقطعو الجنواز 2 دوائر والثانية تكون اصغر شوييييية من الاولى
نعاودو ناخذو الاطار اللي قطعنا به و ندهنوه بالناباج من الداخل ونحطوه فالطبسيل اللي نقدمو فيه
ناخدو الفريز اللي خلينا للتزيين ونقطعوه بالطول
نبداو نستفوه فجوانب الاطار(الناباج اللي درنا هو اللي يثبتو)
ونزل الدائرة الاولى اللي قطعنا (الدائرة لكبيرة)
ونخوي فوقها شوية من لاموس
نديرو من فوقها دوك الطريفات اللي بقاو ملي قطعنا الدائرتين (بلى منوصلو للجوانب كما الصورة)
نخويو ثاني شوية من لاموس
ونحطو فوقها الدائرة الثانية (يعني الدائرة اللي اصغر علاش قطعناها اصغر حت مابغيناش تبان الجنواز من جناب)
ثم نخويو لاموس اللي بقات
نغطيها وندخلها ثلاجة تشد راسها
فهاد الوقت نطلعو شانتيي كمامكتوب فالعلبة
هادي اللي استعملت
حتى تعقد
نخرجوها من ثلاجة ونكملو بطبقة من هاد الشانتي ونملسو الوجه
ونزينوها بالشانتيي اللي بقات كل وحدة و ذوقها فالتزيين
تبرد مزياااان عاد تقدم
نصائح
1-كما شفتو جنواز مفيهاش لخميرة حت طلعتها كما قلت لكم رغوة وطلعتها بهداك الخلاط وجات رطبة و اسفنجية , اكيد شحال من وحدة تكون جربات جنواز بلى خمارةوجاتها قاصحة و حتى انا وقعاتلي حت كنت كنطرب بالباطور وماكنش كيطلعلي رغوة داكشي بغيت نقول اللي معندهاش بحال هاد الالة وعندها الباطور العادي ننصحها تزيد الخميرة و اللي عندها بحالها بلى مديرها تبع غير طريقة اللي قلت واتجيها رطببببة
2-الفريز اللي تزينو به من الفوق دهنوه بالناباج باش يبقا يلمع
3- كما شفتو درتها صغيرة شوية اللي غادي تبغي تقطع دوائر اكبر من هادو ننصحها تضاعف كمية لاموس الفريز و كريم الشانتييه باش يجيوها الطبقات باينين
هادشي اللي تفكرت عيييت ههههه سمحولي هضرت بزاااف غير بغيت باش كلشي يفهم وكلشي يجيه بسيط وحتى المبتدئات يجيهم بسيط واخا حتى اانا غي مبتدئة
ليست هناك تعليقات:
إرسال تعليق