السلام عليكم ورحمة الله تعالى وبركاته
اليوم بغيت نشارككم كونفتير ليمونة وحامضة بطريقتي
نتمنى يعجبكم أنا هو الكونفتير المفضل عندي
المقادير :
ليمونة وحامضة جامدين كنكونو وضعناهم فالكونجيلاتور
لتر ونصف ماء
700 غرام سكر سنيدة
الطريقة :
كنحكو الليمونة والحامضة غير القشرة الخارجية ونحيدو القشرة الصفراء باش متعطيش المرورية فالكونفتير ديالنا
من بعد نكملو عليهم بالحكان حتى الأخير
ناخدو طنجرة نوضعو فيها الماء والسكر ونحركوه شوية ومن بعد نضيفو عليه الليمون والحامض محكوكين ونخليو يطيب شي ساعة ونصف تقريبا الى بغيتي خفيف خليه شوية جاري والى بغيتي شوية جامد خليه يزيد يطيب
نخليكم مع الصور توضح الطريقة
وملي يطيب نعمروه فقراعي ونوضعهم بكوكوط ونسد عليهم يطيبو شي 20 دقيقة من بعد ماتصفر الكوكوط ونخليهم حتى يبردو ونزلهوهم وهاكة كيبقى الكونفتير ديالي لمدة أكثر من سنة من غير الثلاجة مكيوقع ليه والو أنا هادي طريقتي المعتمدة فجميع أنواع الكونفير كيبقى صالح مكيخيابش
هادي صورة الكونفتي من بعد ماطاب فال قراعي كيولي عاقد
نتمنى تعجبكم طريقتي
لاتنسونا من صالح الدعاء
ليست هناك تعليقات:
إرسال تعليق