الفكرة خديتها من المنتدى الله يجازي مولاتها كل خير غيرهي الفكرة ديالها كانت خبز الدار بالكسكسو مفور وأنا نقلت منها طورت الفكرة دخلت عليها بعض التحسينات اللي هو اللبن والنتيجة كانت طوست ولا أروع تكال في نهارو تخيلو هههه بلا مانطول عليكم نبدا على بركة الله
حاجتنا في كاس كبير لبن
معلقة كبيرة خميرة العجين
ملح
حفينة كسكسو مفور تقريبا 200g
فورص حسب الخليط
خديت الكسكسومفور بيني وبينكم شاطليا من الغدا هههه معستو شوية وزدت عليه حفنة من الطحين حتى بدا كيتلصق
درت منو كورة كيفما كتشوفو
كبيت اللبن وزدت الخميرة والملحة
فرتلت عجينة الكسكسو وزدتها وبديت كنزيد الطحين شوية بشوية حتى تجمع الخليط كيكون بحال عجين الخبز العادي
جمعت العجينة سمحوليا ماصورتش هاد المرحلة خليتها ترتاح شي 15دقيقة منبعد رشيت الطحين وطلقتها كيفما كتشوفو
لويتها وكلشي كيعرف الطريقة ودرتها في مول مدهون بالزيت وخليتها تخمر
هاهي منين خمرات دهنتها بشوية زيت روميا ودخلتها للفران سخون على حرارة عالية 200درجة لمدة 30دقيقة
وها الطوسط ديالنا واجد
هاهو في الفطور
وهاهو محمر في آلة البانيني مقرمش من برة وطري ولديد من جوة هههه
آش كتسناو نهار الجمعة إن شاء الله شيطو الكسكسو وديرو بحالي
ليست هناك تعليقات:
إرسال تعليق