المــــــــــرأة العربية : كلمار معمر جربوه ماغاديش تندمو بالتفصيل والصور اكيد

بسم الله الرحمن الرحيم

السلام عليكم اخواتي في الله

طبق اليوم

الكلمار معمر

طبق لذيذ وخفيف ومتشبعوش منو

المقادير

كلمار على حسب الاشخاص يكون منقي مزيان ومغسول ومستقطر
ميرلا بطبيعة الحال منقية ومغسولة ونزولوا ليها الجلدة خدمتها تماما بحال السردين ونطحنوها
الا مكانتش متوفرة عندكم يمكن ليكم تعملوا فبلاصتها السردين او الروز بوحدو حت هما تيجيو زوينين
روز منقي ومغسول ومستقطر
مطيشه منقية ومقطعة بالزريعة ديالها
قزبور ومعدنس مكرد
توم
انتوما غتعملوا المقدار على حساب الاشخاص لي عندكم يعني عينكم ميزانكم

والعطرية طبعا

تناخد كاسرونة وتنعمل فيها الروز لي نقيناه وغسلناه وخليناه يستقطر ونزيدعليه جميع العطرية لي عندي
م.صغيرة كمون
م.ص ابزار
م.ص خرقوم بلدي
م.ص ملح
م.ص تحميرة
م.ص سكينجبير الربيع مكرد والتوم وزويتة مخلطة يعني رومية وبلدية وورقة سيدنا موسى نخليهم يتشحروا غي شوية ونزيدو عليهم الماء الكافي ونخليو الروز يطيب مزيان حت يشرب المرق ويولي ناشف

تناخدو الكوكوت ديالنا ونحطوا فيها مطيشة لي قطعنا ونعملوا فيها نفس العطرية لي عملنا فالروز من قبل ونزيدو الزيت ونخليوها تطيب مزيان حت تهبط مطيشة الا بانت ليكم نشفات زيدوا كويس تاع الما وخليو فيها شوية المرق فاش يطيب الكلمار ديالنا

ملي طاب الروز خليتو حت برد وزدت عليه هبرة الميرلا لي طحنت من قيل وخلطت كلشي مزيان

تناخد الكلمار وناخد معلقة صغيرة من الحشوة ونبدا نعمر حت نحس بيه عمر ونحبس مخصش الحشوة تفوت فم الكلمار باش ميخرجش لينا فالمريقة بهاكا متنحتاجش نجمعوا بخيط او نسدوا بعود اسنان