مسيمنات بالبيض من اروع ما يكون بطريقة حشو مميزة

اش خباركوم البنات
شربتوا اتاي و لامازال
ايوا الا عاد مشربتوه اجيو مرحبا بيكوم

اليوم جبتلكوم مسيمنات من ابتكاري الشخصي



كيطلعوا شهوة منهم و رااائعين كنتمنى تجربهوم و يعجبوكوم




لمسيمنات ساهلين اعتمدوا الطريقة الي موالفين
لكن ما فيها باس نشارككوم كيف عملتهوم اليوم

عملت زلافة دقيق الفينو و نصف زلافة فورص
ملح و نصف معلقة سكر و نصف معلقة خميرة
وعجنت الكل عالاقل ربع ساعة حتى حصلنا على عجينة لينة و رطبة
شكلتها كريات مسحتهوم بزويتة
وخليتهوم يرتاحوا نصف ساعة




فرقت لمسيمنات كيف العادة و دهنتهم بزبيدة و جمعتهوم
كملت الكمية


وبديت باول وحيدة طلقتها شوية و طيبتها نصف مدة الطهي
وخليت الكل يبرد



فهااد الاثناء وجدت الحشو

4بيضات خلطتهوم مزيان مع مرتدلا و نصف حبة فلفلة حارة و ممكن تستعملوا الحلوة شوية من البصلة الخضارية و الجبن و ملح و الابزار و رشيشة الزعتر


غير بردوا لمسيمنات فتحناهوم من الجنب وبدينا نضغطوا بالايد حتى حصلن على فجوة كبييرة
و مع تنفخوا و تفرقوا فالعملية ساهلة

كنعمل مغرف من الحشو فقلب المسمنة و نسدها


ونعاود نعملها تطيب راها مكاتاخدش الوقت كتحمر و البيض كيطيب فوقت وجيز
كنقدمها سخوونة كتطلع لذيييذة و بصحتكوم و راحتكوم