السلام عليكم البنات اشخباركم نتمناكم بالف خير يا رب
هاد البسطيلة كتجي فننة و مخاالفة بشهادة كل من داقها عندي و ما كيخرجو حتى ياخدو المقادير هههههه شكون شكار راسو هههه
المقادير
دجاجة كبيرة نعملوها فكوكوط مع الماء قياس فاش تطيب و نزيدو عليها 1 خيزو و بصلة و نصف حامضة و الملح
اناهنا زدت معها طريف اخر حيت بانت لي بحال الى صغيرة شوية الدجاجة ههه
نصف كاس زيت العود او اكثر شوية
زلافة صغيرة بصلة مشلظة
2 فصوص ثوم محكوكة
حك صغير شومبنيون
نصف معلقة صغيرة عطرية الدجاج
ابزار
ملح
الهريسة او الحرور السودانية
عصير حامضة صغيرة
2 باكيات متوسطين الشعرية الصينية
المعدنوس
باكية ديال الفرماج ساندويتش ديال 12 وحدة
نطيبو الدجاجة فكوكوط نسدو عليها ومن بعد نصفيوها ونخليوها تبرد ونفرتتوها و الماء فاش طيبناها ما نرميوهش نديرو فيه الشعرية الصينية ومن بعد نصفيوها حتى هي و داكشي لي صفينا صافي نرميوه
نعمل الزيت فالمقلة ونزيدو البصلة حتى تطيب شوية ونزيدو الشومبنيون و الملح ابزار هريسة عطرية الشوارما ومن بعد ما يطيبو نزيد الدجاج لي فرتتنا و عصير الحامض و الشعرية الصينية ونطفيو البوطة ومن بعد عاد نزيدو المعدنوس مقطع و نخليو الحشوة تبرد و من بعد نعمرو البسطيلة ديالنا عادي و حنا كندهنو الورقة ديالنا بالزبدة والبيض و قبل ما نسدوها نستفو فوق الحشوة الفرماج ديال الساندويتش عاد نجمعو البسطيلة و نشدو شوية الورقة شي 2 او 3 ندهنوهم مزياان بالزبدة ونلويهم ونقطعوهم رقاق و نزوقو بهم من الفوق ديال البسطيلة وناخدو شوية الفرماج ساندويتش حتى هو نقطعوه رقيق و نزوقو به و ندخلوها للفران تطيب على نار مهييلة
الفرماج لي زوقت به انا كنديرومن الاول قبل ما ندخلها للفران و لكن تقدرو تخليوه حتى الاخير حتى تطيب عاد تحطوه و تخليوه غير شوية وتطفيو الفران باش ما يجيش كحل
الصور كتوضح كلشي
ليست هناك تعليقات:
إرسال تعليق