كيكة بدانيت و كريمة القهوة آخر اصدار

بسم الله الرحمن الرحيم 

السلام عليكم

 هانا جبت ليكم كيكة ديال دانيت هاد المرة بمذاق القهوة تتجي هائلة وتتحمر الوجه قدام ضياف اكيد ايلا جربتوها مغديش تندمو عليها

المقادير :
(العبار بكاس دانون دانيت ديال 90غ)
5 بيضات
كاس دانيت بشكلاط
3 كيسان سنيدة
3/4 كاس زيت
1/2 كاس كاكاو
1/2 كاس قهوة معصرة
3 كيسان طحين
3 خمارات

طربي دانيت مع سنيدة مزيان 

تزيدي الزيت،القهوة وتخلطي عاد تزيدي البيض وحدة بوحدة مع قريصة الملح يعني تزيدي بيضة وطربي وتزيدي تانية وطربي حتا تكملي
زيدي الطحين مغربل مع الخميرة والكاكاو و حركي بسباتيل
دخلي طيبيها بحال أي كيكة عادية و خليها تبرد

كريمة القهوة
1/4 لتر حليب
زلافة صغيرة قهوة معصرة او كاس عنبة
3 معالق كبار سنيدة
3 معالق كبار كريم باتسيير
80غ شكلاط
معلقة كبيرة الزبدة

عملي الشكلاط مع الزبدة يدوب
وفوق نار مهيلة عملي الحليب والقهوة مع غبرة الكريم باتسيير و سنيدة وحركي حتا يعقاد
ملي يعقاد زيدي الشكلاط المدوب

قسمي الكيكة على جوج و سرحي الكريمة وغطيها بالطبقة الثانية ديال الكيكة
وحتا جناب الكيكة

كلاصاج
دانيت بالشكلاط
100 غ شكلاط اسود
في بان ماري كتسخني دانيت و تزيدي الشكلاط حتا يدوب و سرحي فوق الكيكة
وكتعملي نقيطات كبار بكلاصاج كراميل (انا دوبت الشكلاط ابيض مع شوية دانيت بالكراميل)
و كتعملي خطوط عشوائية وتحصلي على شكل رخامي
وفي جناب زوقتها بشكلاط فرميسيل

 هادي درت ليها العكس زوقتها بكلاصاج الكراميل نفس الطريقة ديال كيكة بكريمة الكوك لي حطيت